[ad_1]
सांगली : निर्बंधमुक्त वातावरणामध्ये तासगावचा २४३ वा रथोत्सव गुरूवारी मोठ्या उत्साहात साजरा झाला. मंगलमूर्ती मोरया, गणपती बाप्पा मोरयाच्या गजरात श्रींची पंचधातूची मुर्ती असलेला रथ एक किलो मीटर अंतरावरील काशीविश्वेश्वराच्या दर्शनाला निघाला त्यावेळी गणेश भक्तांनी गुलाल, पेढ्यांची उधळण केली. यावेळी रथाचे सारथ्य मराठ्यांचे अखेरचे सेनापती परशुरामभाउ पटवर्धन यांचे वंशज राजेंद्र पटवर्धन यांनी केले.
या रथोत्सवास दारूबंदी व उत्पादन शुल्क मंत्री शंभूराजे देसाई, खा. संजयकाका पाटील, राष्ट्रवादीचे युवक नेते रोहित पाटील आदींसह राजकीय सामाजिक क्षेत्रातील अनेक मान्यवर उपस्थित होते. रथोत्सवादिवशीच गणपती पंचायतन संस्थानच्या ऐतिहासीक दीड दिवसाच्या गणपतीचे विसर्जन होते. ’मंगलमूर्ती मोरया, गणपती बाप्पा मोरया’ च्या जयघोषात, अलौकीक व नयनरम्य सोहळ्यात हा रथोत्सव पार पडला. ’मंगलमुर्ती मोरया’ च्या जयघोषात भाविक गणरायाचा रथ दोरखंडाच्या सहाय्याने ओढतात.
गणपती मंदिर ते समोर अर्धा किलोमिटरवर असलेल्या काशिविश्वेश्वर मंदीरापर्यंत हा रथ ओढत नेला जातो. रथ ओढण्यास सुरवात झाल्यानंतर गुलाल व पेढ्यांची झालेली उधळण, युवकांनी रथासमोर केलेले मानवी मनोरे, झांज पथक, समोर दिमाखात चालणारी गौरी’ हत्तीण यामुळे संपूर्ण वातावरण मंगलमय झाले होते. करोनामुळे तब्बल दोन वर्षांचा खंड पडल्यानंतर यंदा तासगावात गणेशोत्सवाचा आणि रथोत्सव सोहळ्यात मोठा उत्साह दिसून आला.
मराठा साम्राज्याचे शेवटचे सरसेनापती परशुरामभाऊ पटवर्धन यांनी इ. स. १७७९ मध्ये तासगावच्या श्री सिद्धिविनायक गणपतीची प्रतिष्ठापना केली. तेव्हापासून ही परंपरा अपवाद वगळता अखंड सुरू आहे.
[ad_2]
